الصداقه بين الشباب والبنات؟؟؟؟؟؟؟؟؟؟؟؟؟؟؟

السلام عليكم ورحمة الله وبركاته


الصداقة مابين البنت والولد


عن ظاهرة الصداقة المنتشرة مابين البنات والشباب اسمحولى اقول للبنت والولد كلمتين قبل ماادخل فى الموضوع
بقول للبنت.. حبيبتى من قلة البنات تبقى صديقتك (ولد)
وبقول للولد.. من قلة الولاد يبقى صديقك (بنت)


دى كانت البداية وكملوا معايا لكن ...من غير زعل..



الى البنات..


حبايبى ازاى بتقدروا تكلموا ولاد فى التليفون .. مبتحسوش ولو للحظة انكوا بتعملوا حاجه غلط.. ايوه اكيد عارفين انه حاجه غلط .. لانكوا مش بس بتكلموا ولاد فى التليفون ده انتوا كمان اول مابتحسوا ان بابا او ماما او اخوكى او اختك قريبين منك بتكلميه كأنه بنت .. يعنى بتكدبى على أهلك.. بالاضافه لكده فواتير التليفون اللى بتيجى مرتفعة مش بتحسى بالذنب لانها من كلامك مع ولد مش واحده صاحبتك..


ممكن تقوليلى احنا بنتكلم كلام عادى ..
فهقلك وليه متتصليش بصاحبتك بدل ماتتصلى (بصاحبك) مش كله كلام
هتقوليلى مش عارفه ليه بيحصل ده بس بحس براحه اكتر وانا بتكلم معاه فبفضله على صحباتى
فهقلك اكيد طبعا هتحسى براحه لان الشيطان موجود.. امال هو لازمته ايه .. ده يبقى فشل فى مهمته لو ماخلاكيش تفضلى صاحبك على صاحبتك
ياترى هتسيبى الشيطان هو اللى ينتصر ولا هتنصرى حبك لربنا وأّمانتك مع أهلك
..لكى الاختيار..


عارفه حبيبتى ممكن تقوليلى الملل والزهق هما اللى بيدفعوكى لكده وكمان انك شايفاهاه انها بقت حاجه عادية كل البنات بتعملها..
حبيبتى والله انا حاسه بيكى
الملل
والفراغ
ويمكن مفيش حد حاسس بيكى لامن صحباتك ولامن اهلك
ويمكن الشخص ده اكتر واحد بيفهمك
وحاجات تانية كتير..
لكن اسمحى لنفسك انك تفكرى ولو دقيقه واسألى نفسك (هل انا راضية عن نفسى وانا بكلم ولد؟؟)
( ياترى ربنا راضى عنى وانا بكلم ولد ولا مش راضى وزعلان منى) جاوبى على الأسئلة دى بصراحه
لازم تجاوبى دلوقتى.. قبل ماتتسألى من الملكين فى القبر ومن ربنا يوم القيامة..


وسيبك من البنات اللى حسسوكى انها حاجه عادية لان زى مافى كتير بيكلموا ولاد فى الاكتر منهم مش بيكلموا ولاد
وكمان احنا كلنا فى الهوا سوا ..فمثلا انا زيك مش بلاقى حد معايا ومش بلاقى حد يفهمنى واخواتى ولاد ومامتى وبابا مش موجودين يعنى طول اليوم لوحدى .. يعنى وحده من كل النواحى .. لكن عمرى مافكرت اصاحب ولاد


بصراحه كنت اتمنى لكن للأسف كتير حاولوا يكلمونى ويكسبوا صداقتى لكن ده طريق وكل واحد بيختار طريقه وانا مختاره طريقى ان كلام او صداقة الولاد ممنوع لان زى ماقلت فى البداية مش من قلة البنات اصاحب ولاد او اكلم ولاد او اطلب حاجه من ولاد.

وكمان بنات كتير زيّنا مش بيكلموا ولاد فاتشجعـــــــــــــى
ولو كنتى انتى بتكلمى ولد قوليها لنفسك
مش هكلم ولاد تانى
واستغفرى ربنا
وأأكد ليكى انك هتذيدى فى نظر نفسك مليون مره وكمان هتذيدى فى نظر اى ولد كنتى بتكلميه مليون مره
بس لازم ماترجعيش تكلميه تانى وماتقوليليش مقدرتش ومش هقدر.. لازم تصممى .. وساعدى نفسك وابعدى عن الاسباب اللى بتساعدك انك تكلميه وادعى ربنا انه يعينك وان شاء الله هتلاقى نفسك بقيتى قادرة تعيشى من غير كلام ولاد.



الى الشباب..



انتوا بتستفادوا ايه لما بتكلموا بنت فى التليفون ولما بتخرجوا مع بنت؟؟؟
لو كانت البنت دى اختكوا كنتوا هترضوا ده ليها
هتقوليلى احنا اخواتنا البنات مايعملوش كده اصلا
فأنا هقول ليكو حديث للرسول صلى الله عليه وسلم(حب لأخيك ماتحبه لنفسك) مادمتوا انتوا مابتحبوش يحصل ده لاخواتكوا وماترضوش بيه ليهم يبقى فى نفس الوقت ماترضوش بيه لبنات الناس واعتبروهم اخواتكم


ممكن فعلا الاقى شباب بيقول عادى وفيها ايه لما اكلم بنت ومافيهاش حاجه لما اختى تكلم ولد
بصراحه لو كان فى شباب كده يبقى ونعم الرجوله.. ولاتعليق




الموضوع ده كبير واتمنى ان الشباب والبنات يشاركوا بوجهات نظرهم وبأرائهم
الصداقة موضوع حاليا فى غاية الأهمية وفى نفس الوقت فى غاية الخطورة ولازم مناقشة وتوضيح من جانب جميع الأطراف


على فكره الكلام ده منقول من موقع عمرو خالد يا ريت اعرف فعلا الاراء فى هذا الموضوع

بجد كلام جميل
ياريت كل البنات
تاخد بيه

الموضوع جميل جدااااا جدااااااااااااااا وبيناقش المجتمع الحالى اللي نسى المبادىء والقيم وكل شىء به سهل وما فيش حاجة عندهم اسماه غلط او حرام لدرجة ان البنت او الولد اللي عنده مبادىء وقيم بقى يسمه عبيط او عبيطة فى هذا الزمن
وياريت فعلا يفيقوا ويصحوا من الغفلة قبل ما الزمن يعدى وقبل الندم يملىء قلوبهم وده كله لأن عصرنا عصر النت والأفلام والأغاني فالصداقة بعد ان كانت أحلى ما في الدنيا أصبحت سلاح ذو حدين وفهموها غلط
على فكرة يابوسى في حاجات كثيرة حلوة في حياتنا وبنستغلها أستغلال غلط
وياريت نستغل النت فى حاجات علمية وفوائد لتكوين شخصية ممتازة وياريت الأفلام ناخذ الكويس ونسيب الوحشن فيها

يا ريت فعلا كل البنات والولاد يفيقوا من الغفله ده ويا ريت كل واحد يبقى عنده مبادى فعلا ماشى عليها وشكرا جدا على ردك يا مى

العفو يابوسي انا اللي بشكرك على موضوعك الجميل والجرىء

بس يا ريت يكون هنالك تفاعل اكثر ونريد ان نعرف كل الاراء فى الموضوع ده لانه مهم جدا ومنتشر

ممكن يكون رايك يا مهندس صح بس يا ريت فى الغالب ما يكونش فيه كلام خالص لا فى الدراسه ولا غيرها لان لو فيه حاجه عاوزها ممكن يكون فيه ولاد كتير تانيين اكيد غيرها يعرفوها بس انا مش باقتنع بانى اكلم حد عشان خاطر عايز منه مصلحتى وبس ولو هيبقى فيه النوع ده يبقى من بنت زيى احسن والله اعلم

على العموم مع أحترامى لكل الأراء
أحب أعرض رأي بالتحديد
بالنسبة للبشمهندس بسام
حضرتك تقصدك من وجهه نظرك ان المصلحة بين الولد والبنت تقصد معلومات لو قصدك معلومات أعتقد انك ممكن تأخذها من أى ولد ولو أى ولد ما يقدرش يديلك معلومات أنت عاوزها فى الحالة ده ممكن تلجأ الى دكتور أو معيد ولو معرفتش ولونها مستحيلة ألجأ لبنت وفى داخل المدرج وبالنسبة للكشكول لتصوير محاضرة مثلا أعتقد عادى أنت مش بتعمل حاجة الا انت تأخد الكشكول وترجعه يعني مش بيحصل كلام الا ممكن أخذ الكشكول بس ومعتقدش ان ممكن اى حاجة تضطر فيها انك تكلم مع بنت اما بالنسبة للشغل فيما بعد اعتقد ان المناقشة بين الاولاد والبنات مطلوبة في حدود الشغل لأن فى الحالة ده مفيش دكتور او معيد وبالنسبة للشغل نفس الفكرة فى مشاريع التخرج بس ذى ما قلت الكلام فى حدود العلم فقط وأعتقد أن مفيش مصلحة الا في حدود ولو انت بتكلم على قسم كهربة بالتحديد أعتقد أن كله بقى مصلحة حتى كلام البنات مع البنات أو الأولاد مع بعض أنا لاأقصد أحد بالتحديد لكن هذة وجهة نظرى بالنسبة للتعامل مع الأغلبية ولا أقصد الكل والله أعلم

انا معاكى يا مى فى اننا نقدر ناخذ اى حاجه من اى بنت او نسال اى دكتور او معيد وبعدين انا عن نفسى لا يمكن اروح اطلب من ولد حاجه حتى لو كنت فى احتياج شديد لها ده رايى واظن ان الكلام ده موجود فى كل الاقسام مش كهربه بس وانا اللى خلانى اخد الموقف اكثر ده طريقه التعامل فى الكليه وخصوصا فى قسم عماره مثلا فالكلام فى هذه الحاله اظن انه يبقى بلاش افضل بكثير وربنا اعلم بالراى الصح ويا ريت لو حد عنده راى او اى حاجه مذكور عنها هذا الموضوع يا ريت ينزلها

يا جماعه يا ريت باقي الاعضاء يدخوا ويقولوا رأيهم ولاد وبنت لأن الموضوع مهم والكلام فيه له وجهات نظر كتيره ومختلفه

بصراحة مش عارفة اقول ايه على الكلام اللى بعض اعضاء كتبوه انا شايفة ان طالما المعاملة فى حدود الاحترام والذوق مفيش مشكلة وما تنسوش ان احنا كلنا هدفنا واحد
ويا ريت بلاش الحدة اللى انا شايفاها فى بعض الردود دى
اختلاف الآراء ا يفسد للود قضية 8)

كلامك مظبوط يا باشمهندسه المستقبل المهم في المعامله الاحترام ومادام الكلام اللي بيتقال طبيعي ومافهوش حاجه تتعاب يبقي مافيش حرج من إن البنت تكلم الولد وده رأيي وأنا معاك في رأيك يا أمل المستقبل

ميرسى جدا على الرد واتمنى ان يكون فيه تشاور وحوار اكتر من كدة
لا خاب من استشار
امركم بينكم شورى

كل واحد ليه وجهه نظر مختلفة عن الأخر بس الصح حتى الأن لم نعرفوا

علي فكرة انا راى من راى البشمهندس بسام ومدام التعامل في حدود الاحترام وداخل حدود الكلية فانا فى راى ان ده عادى انا مثلا اثناء تدريب المساحة بتاعي مجموعتى كان فيها اولاد وكان لازم ان كلنا نتعامل مع بعضنا وكلنا كنا بنتعامل ونتكلم مع بعض 8)

اه وكمان لازم نرجع ونشوف رأى الدين أيه
لأن هو ده مرجعنا فى كل شئ

بجد يا محمد رأيك جميل جدا وملخص كل الأفكار اللي اتقالت واللي المفروض يحصل ويا ريت لو حد عنده أضافه يقول عشان نوصل لأدق وأصح رأي

شكرا يا engma على ردك وعلى كل الردود ويا ريت اى حد عنده اى استشهاد دينى او اى راى مفيد فى هذا الموضوع يقوله

المشكلة يا جماعة ان في اختلاط في اغلب مجالات حياتنا
طيب قولي لي ازاي مدرس او مدرسة في المدرسة او الجامعه ممكن يكون قريب سنا من الطالب بتاعه و تحصل بينهم مثلا قصة حب و جواز و الكلام ده

انا رأيي ان السبب في كدا الاختلاط زي ما قال بسام و طالما في اختلاط ها يحصل الموضوع ده و لو بنسبة صغيرة او كبيرة
و بالتالي القضية بتعتمد علي قيم جديدة مبادي جديدة
و بتعمد اولا و اخيرا علي الاتنين اللي بيعاملو بعض ومدي قوتهم و ايمانهم و تمسكهم باخلاق دينهم

لكم جزيل الشكر
انا اول واحد شفت الموضوع ده لما كتبته بوسي
لكن للاسف ملحقتش ارد عليه و استفدت من اراء بعض اللي ردوا قبلي
زي بسام
سمسم حبيبي

الموصوع جميل

كل الاراء جميله وكل واحد معبر عن وجهه نظره بالنسبه لي

انا مع رأي البشمهندسين ضياء وبسام ومع رأي

future eng

فعلا كلام محمد عبد الغني حلو جدا و ملخص لمعظم ارائنا

ميرسى يا داليا وياريت اكون قدرت اقنع باقى الاعضاء