طاطي راسك

طاطي راسك-أحمد فؤاد نجم
طاطي راسك طاطي طاطي .. انت ف وطن ديمقراطي ..
انت بتنعم بالحرية .. بس بشرط تكون مطاطي
لما تكون شغال بذمة .. خايف على مصلحة الأمة ..
شغلك يطلع من غير لازمة .. علشان مبيعلاش غير واطي
طاطي راسك طاطي طاطي .. انت ف وطن ديمقراطي

لما حاميها يكون حراميها .. وبلاده ورا ضهره راميها ..
طالع نازل واكل فيها .. مسنود بالبدلة الظباطي
طاطي راسك طاطي طاطي .. انت ف وطن ديمقراطي

لما شقاك يصبح مش ليك .. فقرك سد السكة عليك
تتلفّت تلقى حواليك ..
إما حرامي و إما عقاطي
طاطي راسك طاطي طاطي
.. انت ف وطن ديمقراطي

لماتلاقي بلاد الدنيا .. فيها البني آدم حاجة تانية ..
وانت في الطبقات الدنيا
.. قرد مسلسل أو وطواطي
طاطي راسك طاطي طاطي
.. انت ف وطن ديمقراطي

لما الجهلة يبقوا أمامك .. أو فوقك ماسكين ف زمامك .
. ويسوقك ع الهلكة إمامك .. تشرب م السم السقراطي
طاطي راسك طاطي طاطي .. انت ف وطن ديمقراطي

لما الكلمة تكون بتدينك .. لما تخبي ف قلبك دينك .
. لما الذل أشوفه ف عينك .. هات إحباطك على إحباطي
طاطي راسك طاطي طاطي انت ف وطن ديمقراطي ..
انت ف وطن ديمقراطي
__________________

رائع جدا تسلم ايدك

الله يسلم يا بشمهندس

الحمدلله انها عجبتك

تسلم ايدك يا بشمهندسة

نورت الموضوع يا بشمهندس

جميلة جدا تسلمى


بس انا معترض على طاطى راسك
يعنى على الشاعر مش عليكى
لان دة يعنى الاستسلام
واحنا مش عايزين دة
بس تشكرى على الموضوع

بس الشاعر بيقول كده علي سبيل السخريه مش اكتر


السخرية دى كترت اوى والله انا شايف اننا نتكلم ف حلول المشاكل
ولا انتى اية رايك

كده انا معاك جداااااااااااا

بس ده نظام حكم وحاشيه من الظلمه وآكيلين حقوق الناس ايه الحيله اللي بأدينا احنا

خلاص الفقراء بيزدادو فقر علي فقرهم والاغنياء بيزدادوا غني علي غناهم وأنقرضت الطبقه الوسطي وكله

بسبب نظام الحكم لما حاميها يكون حراميها يبقي انت شايف حل؟؟؟!!!!!!!!!!!!!!!!!!!!!!!!!!

بس بس خدى رايحة فين انتى بتقولى اية ؟
دانا اكتر واحد ف الدنيا بيحب النظام
النماس مرتاحة والمواصلات كتيرة
والعيش كتير والطماطم رخيصة
والشوارع نظيفة
ايوة ياختى انا عايز اروح البيت لامى
انتى مش عايزة براحتك
هههههههههههه

لما الواحد يصلح من نفسة وينصح اللى حوالية
ونرجع الامر بالمعروف والنهى عن المنكر هنبقى خير امة اخرجت للناس
زى ما كنا دايما

صح ولا غلط ؟

اول ما قرأت كلامك صدقت وصعقت ان دي تكون وجهه نظرك بس اول ما اتكلمت عن الطماطم عرفت انها ترياه

اشمعنى الطماطم يعنى ؟


وبعدين الاصلاح لبيبدا من تحت مش من فوق يعنى من الصغير وانا رايى كدا
لان الاصلاح من فوق صعب قوى
ودايما الكبير شايف نفسة صح وما بيقبلش النصح
وبعدين حكاية ان ربنا يعذبنا دى احنا عندنا امانين امان راح والتانى لسة معانا

ربنا قال

(وما كان الله ليعذبهم وانت فيهم وما كان الله معذبهم وهم يستغفرون )
بس يارب ميكنش فية غلط ف كتابة الاية
بس اهم حاجة ف كلامى عايز اوصلها انى الواحد يصلح من نفسة ويبص دايما للى اعلى منة
وبكدا ان شاء الله الحال هيتعدل

ل مكتوبه صح الحمدلله بس يمكن يكون قصدي اتفهم غلط شويه بس يكفي اني فهمت قصدك وبقولك مقتنعه بردك جدااا انا يمكن باصه للموضوع بزاويه تانيه
بس اهم حاجة ف كلامى عايز اوصلها انى الواحد يصلح من نفسة ويبص دايما للى اعلى منة
وبكدا ان شاء الله الحال هيتعدل






بس انا احب افهم قصدك صح ما بحبش اكون كدا مش فاهم او فاهم غلط