ثــــــــــــاني حلقـــــــــــات ساعــــــة صفــــــــا مع العضوة جــــوجـــو

زائر

اهلا بيكم في حلقه جديد من برنامجنا ساعه صفا
يسعدني ويسعدكم انه تكون معانا النهارده العضوة جوجو
اهلا بيكي ياجوجو معانا
عرفينا الاول بنفسك
اسمك وسنك وعنوانك
عدد اخواتك وترتيبك بينهم

اهلا بيكى يااختى
اسمى
هاجر
عندى 21 سنة
عنوانى بقى
مربع الفيلل شارع الاباصيرى المتفرع من عبد السلام عارف
محافظة بنى سويف
عدد اخواتى خمسة
وانا الوسط الحسابى
يعنى الوسطانية
يعنى التالتة يابت بلاش ذكااااااااااااء

زائر

طيب تمام
حابه اسئلك في الاول شويه اسئله شخصيه
اشمعني مدني اللي دخلتيه ؟
وهل انتي حابه دراستك ولا لا
وايه هي اهم اهتماماتك في الحياه
وشايفه مستقبلك في الفتره اللي جيه دي ازاي

ايه هو اصعب موقف اتعرضتي ليه وهل قدرتي تواجهيه ولا لا؟
احكيلي عن شخصيتك صفاتك وعيوبك وميزاتك كل حاجه عنك

هي هو القانون اللي انتي ماشيه بيه في حياتك عموما

احب اوقاتك بتحبي تقضيها مع مين وفين

نكمل لما تجاوبي علي دول

زائر

نكمل باقي الاسئله علي ما تجاوبي اللي فاتو
هل انتي بتثقي في الناس بسرعه ولا لا
ولو لا يبقي لا ليه؟

تعالي نخرج من جو الاسئله الشخصيه واسئلك اشئله عامه شويه
ايه رايك في شباب اليومين دولورايك برضه في البنات
ومن وجهة نظرك ايه اللي انتي شيفاه عشان حالهم ينصلح
ايه هي الخطوات اللي لازم تحصل

تفتكري ايه اللي ناقص الشباب الايام دي؟
طبعا كل الناس رايها في التعليم انه سياسه فاشله تفتكري ايه هي الخطوات اللي لازم نعملها
عشان نرفع مستوي التعليم
وكمان اهم مرحله المرحله الابتدائيه لاننا بنزرع في نفوس الاطفال قيم سواء حلوة او وحشه
ايه هي القيم اللي لازم يتعلموها من وجهة نظرك
لو اتعرض عليكي تمسكي وزاره من الوزارت هتمسكي وزاره ايه ؟ ايه الوزاره ي
اللي يعني لو اتعرضت عليكي توافقي عشان حاسه نفسك هتقدري تخدمي البلد وتغيريها
ايه رايك في شوارع مصر؟
لما بتمشي في الشارع بيخطر علي بالك ايه من ناحية التطوير يعني

سمسمه كتب:: طيب تمام
حابه اسئلك في الاول شويه اسئله شخصيه
اوووووووووووووووووك اتفضلى يااختى
اشمعني مدني اللي دخلتيه ؟
اممممممممممممم
عشان بحبه
وماشوفتش نفسى ف اى قسم تانى
يعنى الاول بصراحه كنت داخلة هندسة عشان اتصالات بس بعد كده غيرت رايى تماماااااااااااا
وكرهت كهربا كلها بحس ان اللى بيدخولها ناس مكلكعين كل همهم المذاكرة وبس والدح فبصراحه هما اللى كرهونى فيها
لانى مش بحب الاسلوب ده ف المذاكر ة خااااااااااااااااالص
وعمرى عمرى مافكرت ادخل عمارة البركة ف دكتور رامى طلعت جابلى عقدة من الرسم من ساعة اعدادى
وانا من النوع اللى ماعندوش قدرة ع الرسم لمدة طويلة بتخنق منه اوووووووووى
وبصراحة فكرت ف صناعية جامد جداااااااااااااااا عشان ليها مستقبل حلو اووووووووووووى وكنت خلاص المفروض دخلتها
بس كنت مقلقه منها وكان داخل دماغى مدنى
وابن عمى ف هندسة قسم ميكانيكا انتاج يعنى صناعية جزء منه فقالى بلاش مش للبنات القسم ده
وقومهم عليه ف البيت فقولت ادخل بقى اللى كنت ناوية عليه فحولت من صناعية لمدنى حبيب قلبى
وهل انتي حابه دراستك ولا لا
حباااااااااااااااااااااااااه جدااااااااااااااااااااااااا فوووووووووووووق ماتتخيلى انا بعشق مدنى اووووووووووووى
بس مش حابه الاسلوب بتاعنا ف دراستنا ودش ف المناهج
مش بنستمتع بالمادة ولا بنفهمهما كله دش
وصم عشان تتدخل تكب ف الامتحان وتطلع بعد الامتحان ابيض يافله
وايه هي اهم اهتماماتك في الحياه
بصى ياحجه بقى اهم اهتماماتى ف الحياة
اولا طبعااااااااااااااا نفسى ربنا يبقى راضى عنى وبحاول اعمل اى حاجة عشان اقوى علاقتى بيه
ثانيا بقى انا ان شاء الله عاوزة اكون مش مهندسة والسلام زى اللى بشوفهم دول يعنى اعرف ناس دخلو هندسة عشان يطلعوا بشهادة عشان عريس وبس
انا مش عاوزة كده بقى
انا دلوقتى بحاول اطور من نفسى
عاوزة اكون شخصية مثقفة ف كل حاجة
واقرا كويس
اكون ناجحه ف مستقبلى ان شاء الله وبقعد افكر عشان اوصل للنجاح ده ايه هية الخطوات عشان اتبعها كويس
وكمان من اهتماماتى ف الحياة انى مش ابقى ناسية نفسى بردو
بحب اهتم بنفسى وبمظهرى وبلبسى
وكمان بردو بحاول اخلى نفسى شويه اجتماعية مع الناس وماكونش منعزله
وشايفه مستقبلك في الفتره اللي جيه دي
ازاي
ان شاء الله يكون كويس واحاول احقق اللى بحلم بيه وبتمناه وبحاول اقدر اخطط كويس عشان اقدر اوصل للنجاح ده صح
ومستقبلى مايكونش مخبط وخلاص يعنى اسيبها زى ماتيجى تيجى يعنى شايفة نفس
ى ان شاء الله مهندسة ناجحه ف مجالها ومحقق هدفى ان شاء الله واقدر اسافر بره واشتغل وارجع كمان ممكن احضر ماجستير ف الحاجة اللى بحبها زى الاستركشر كده بعشقه جداااااااااااااااااااااا
ايه هو اصعب موقف اتعرضتي ليه وهل قدرتي تواجهيه ولا لا؟
بصراحة ياسمسمة مش فاكرة كويس كل حاجة يعنى ممكن تكون ف مواقف بس الزهيمر شغاااااااااااااال
بس ممكن نقول ساعة ماكنت ف ثانوى وانا كنت ناوية من صغرى ع هندسة والمشكلة ظهرت بعد تانية لما جبت 96 % فالبيت بقى بابا اصر ع انى لازم اكمل علمى علوم بس انا اصيرت ع موقفى اوووووووووووووى وقولتولهم انى كنت كاتبه رياضة ف الشهادة ومش هغيرها لان ده مستقبلى وانا اللى لازم اختاره واتحمل نتيجة اختيارى ومابحبش حد يتحكم ف شخصيتى ولا ف قراراتى ولا ف مستقبلى الا ربنا طبعااااااااااااااااا فاصريت ع موقفى وبابا قعد يتخانق شويه معايا وزعل شوية والمشكلة انه كان بيسمع من الناس ان هندسة مش للبنات
وان المهندسين شغالين ع التاكسيات واللى متلقحين ع القهاوى وكمان كان شايف ابن عمى ف هندسة وساعتها هوه دبلر اعدادى فده خلاهم قلقانين جدااااااا
بس ع مين انا كنت مخلصة ورقى ومظبطاه ع رياضة وقولت مش هحول يعنى مش هحول دماغى جزمة
احكيلي عن شخصيتك صفاتك وعيوبك وميزاتك كل حاجه عنك
بصى ياستى نكلم ع العيوب الاول
انا عصبيه جداااااااااااا بتنرفز بسرعه اووووووووووو
كمان بشيل من الناس يعنى مش بقدر اسامح بسهولة اى حد
مش بنسى الاساءة بمعنى اصح ماقدرش اغفر لحد جرحنى بسهوله الا طبعا لو كان معزور
بصدق الناس بسرعه بديهم الامان ودى حساها عيب فيه
وكمان ساعات بحس انى بحب اتعزل عن العالم واعيش لوحدى واقعد مع نفسى
وماكلمش حد وساعتها بتبقى حالتى وحشة جدا وبزعل اصحابى منى بس ساعتها فعلا مش بيبقى عندى قدرة ع انى اتكلم مش ببقى قادرة خاااااالص
مميزاتى ياستى
انى بكره الكدب مموووووووووووووت واللى يفكر يكدب عليه ياويله منى ده بقى بيتعلم عليه مية خط ومااقدرش اتعامل معاه تانى
اصحابى بيقولولى انى قلبى ابيض بتنرفز بسرعة بس عالطول بعدها اهدى وبنسى اللى حصل
بحب اتعامل مع ناس واتعرف ع اصدقاء جديدة
بحب انى اقف مع اصحابى دايما ف وقت الشدة قبل الفرح
بحب اصحاااااااااااااااابى جدااااااااااااااا هما حياتى بس دلوقتى حسيت انهم كلهم بعدو عنى بس بردو مازلت بحبهم بس وانا بعيدة عنهم

هي هو القانون اللي انتي ماشيه بيه في حياتك عموما

مش قانون اوى يعنى بس انا بحب ابقى حاطة اساسيات ف التعامل ف حياتى مع اى شخص
يعنى بمجرد ان شخص ف يوم من الايام كدب عليه يبقى ستوب وباخد موقف من الشخص ده وبتعامل معاه بحذر جداااااااااا
او بلغى تعاملى معاه تماما
كمان دايما انا بحب اتعامل مع الناس زى ماحباهم يتعاملوا معايا
يعنى دايما افترض النية الحسنة ليهم
يعنى اقول لنفسى الاول اتعاملى كويس يابت مع اى حد عشان يعاملك كويس
كمان اهم حاجة ماشية عليها ودى اساااااااااااااااااس دايما بابا كل شوية كان بيحفظهالى من صغرى جملة بسيطة ممكن تضحكوا عليها
وهية القناعة كنز لايفنى دايما احب اكون قنوعة وباقل حاجة
وبحب ابص دايما للناس اللى تحتى واقول الحمد لله دايما بابا كان يقعد يقولى كده انا واخواتى
بس ياستى ممكن يكون فحاجات تانية بس الزهيمر واخد حقه اليومين دول
احب اوقاتك بتحبي تقضيها مع مين وفين
بحب اكون مع ولاد اختى بصراحة ماتشبعيش من رورو واحمد بس باجى لوقت فعلا وببقى عاوزه اطردهم من البيت
وبحب طبعا اكون مع اعز اتنين ليه من اصحابى ونخرج سوا ببقى فرحاااااااانه جدااااا
نكمل لما تجاوبي علي دول
اوووووووووووووووووووك مع ان الوقت تقريبا خلص بس سماح بقى

زائر

علي ما تخلصي الاسئله العامه تعالي ندخل
شويه في الاسئله الدينيه والسياسيه
ايه مفهومك عن الساسيه وايه مدي ارتباطها بالدين؟
ايه رايك في سياسه مصر داخليه وخارجيه
ايه اللي ناقصنا كشعب عشان نوصل للتقدم والرقي
ايه رايك في امن الدوله
وايه رايك في المظاهرات
حاسه انك مقصره في واجبك ناحية دينك؟
مين احسن الشيوخ من وجة نظرك؟
فيه سؤال انا سالته امبارح ومش اتجاوب عليه
ايه رايك في حادثه خالد سعيد ومين الظالم ومين المظلوم؟
مش هتجاوبي ولا هتجاوبي
ترشحي مين للرئاسه
قانون الطوارئ ... مع؟ ام ضدد؟
ايه رايك في وزير التعليم الجديد؟
وهل فعلا حصل ظلم كبير في نتايج الثانويه؟
تحبي مين يمسك وزاره التعليم في مصر؟
ايه رايك ف الاحزاب في مصر
ايه هي القوانين الظالمه للشعب من وجهة نظرك

سمسمه كتب:: نكمل باقي الاسئله علي ما تجاوبي اللي فاتو
ادينا جاوبنا اللى فاتو اما نشوف الباقيه يااختى
هل انتي بتثقي في الناس بسرعه ولا لا
الى حد ما اه بحب اتعامل بمبدا الثقه يعنى بس مش ببقى عبيطة اوى ف التعامل بس ببقى حذره شوية ف التعامل وواخده بالى
وانا غالبا قلبى بيبقى صادق ف حتة انه يكتشف الانسان اللى قدامه
بقدر احس الانسان ده يندرج تحت اى نوع وهل هوه يتعامل بأى طريقه وغالبا بيكون قلبى صح عمر قلبى ماخانى بمعنى اصح
ولو لا يبقي لا ليه؟

تعالي نخرج من جو الاسئله الشخصيه واسئلك اشئله عامه شويه
ايه رايك في شباب اليومين دولورايك برضه في البنات
بصى بصراحة فعلا انا مش عاجبنى الحالة اللى وصلنا فيها دى الشباب معظمهم مش هقول كلهم لان ف ناس كويسة بردو كتير
الشباب ف ضيااااااااااااااااااااع سواء بنات او ولاد وبالذات الولاد عايشين حياتهم من غير هدف كل حياته عاوز يعمل شات ويتعرف ع بنات وخلاص طول الوقت بيعمل شات طب فين حياتك فين اهدافك مافيش هدفه هوه انه يتعرف ع بنت وخلاص يدردش معاها
وياعينى ع البنات اليومين دول طب اهتماماتهم منصبه ازاى اوقع شاب عشان يخطبنى
او اعمل ايه عشان ارتبط انا ازاى لحد دلوقتى مارتبطتش هههههههههههههه
ده بقى تفكيرهم طب فين حياتك وهدفك مافيش
ادينى دخلت الكلية وخلاص
اللى بقى يجننى ساعات لما بسال حد من اصحابى هتشتغلى مثلا بعد هندسة تقولى ياستى هندسة ايه
انا بس خدتها عشان شهادة تتعلق ف البيت وتجيبلى عريس كويس عشان ياخد الست البشمهندسة
بقينا خلااااااااااااااااااااااااص ف ضيااااااااااااع بس بردو ف ناس كويسة جداااااااااااااااااااااا وف ناس عايشة عشان هدف تحققه
ومن وجهة نظرك ايه اللي انتي شيفاه عشان حالهم ينصلح
احنا عاوزين سنين عشان حالنا يتصلح
بصى ياستى نبدا مثلا بالتعليم يعنى احنا كلنا دلوقتى علاقتنا بالنت بقت كويسة ومازلنا بندرس بطريقة متخلفه
كل الشباب وقتها ضايع ع النت ولاسباب تافهة ليه مانخليش الوقت ده كله مستثمر ف تعليم يعنى المادة اللى عندك دور ع النت عنها
اديله ف المحاضرة حاجة بسيطة وانت اعيش واتعلم عشان الناس تقدر تبحث بنفسها وتدور ع المعلومة بنفسها عشان تثبت اكتر
كمان حال البلد بيخلى الشباب محبط ماااااااااااااااافيش شغل ومافيش اصلا اهتمام بان احنا عندنا شباب
دى بقى سياسة دوله طفشت الشباب من البلد بصراحه لازم تتغير الحكومة ويجى حد يغير عشان الشباب دى يساعدهم ويشجعهم ويديهم امل عشان يفضلوا ف البلد دى ونحافظ عليها
ايه هي الخطوات اللي لازم تحصل
جاوبت ف السؤال اللى فوق
وكمان عاوزة اضيف ان السبب ف كل ده ان الشباب منهم بعيد عن ربنا
لازم نقرب من ربنا كويس عشان حالنا يتصلح

تفتكري ايه اللي ناقص الشباب الايام دي؟
ناقصهم حاجات كتير
اهمها ان الواحد فيهم يكون ليه هدف عايش عشان يحققه اسالى اى واحد ف الشارع انت هدفك ايه
نفسك تبقى ايه هتعمل ايه مش عارفه عايش وخلاص اهو ايام وبتعدى
كمان لازم نبقى شباب مثقف وواعى احنا شباب بنقلد الغرب تقليد اعمى ف الحاجات الغلط بس
نشوف الموضه ونقلدهم فيها والنت بس ف الحاجت الغلط مش بنحاول ندور ونعلم نفسنا من ع النت
مش بنحاول نبص هما ايه اللى خلاهم يبفرقوا عننا كده وليه احنا وصلنا للمرحلة دى لانهم فعلا قدرو يغزونا بثقافاتهم ويتحكموا فينا وف عقولنا البشريه
وبقوا هما ف تطور مستمر واحنا ف تاخر مستمر
طبعا كل الناس رايها في التعليم انه سياسه فاشله تفتكري ايه هي الخطوات اللي لازم نعملها
عشان نرفع مستوي التعليم
اجاباتها بردو فوووووووووق
وكمان اهم مرحله المرحله الابتدائيه لاننا بنزرع في نفوس الاطفال قيم سواء حلوة او وحشه
ايه هي القيم اللي لازم يتعلموها من وجهة نظرك
اهم القيم ف الاول لازم اغرس فيه علاقته بربنا وان دايما انه يكون مراعى ربنا ف كل حاجة وبيطبق ده ف حياته
وكمان اكون دايما مخليه محدد هدف ليه ف المستقبل ف حياته ومحدد الخطوات دى
واخليه يكتب ورقه دايما بهدفه ف احياة دايما تكون معاه ف اى مكان وكل شوية يبص عليها عشان يتحفز ويبقى كاتب الخطوات اللى بيعملها
ومتابع هوه وصل لاى مرحله انا لو غرست كده ف اطفالنا فعلا هنتغير وهنبقى ناس تانية
لو اتعرض عليكي تمسكي وزاره من الوزارت هتمسكي وزاره ايه ؟ ايه الوزاره ي
اللي يعني لو اتعرضت عليكي توافقي عشان حاسه نفسك هتقدري تخدمي البلد وتغيريها
احب امسك وزارة المالية دى الحاجة اللى اقدر فعلا اكون نافعه فيها او يعنى انا من النوع اللى مش بحب قرش يتصرف كده وخلاص
حابه اكون محافظه ع اموال البلد عارفه هية رايحة وجايه فين
مش زى ماعيشين دلوقت سبهلله وسرقه عينى عينك
ايه رايك في شوارع مصر؟
زى الفل انضف من الصينى بعد غسيله
ههههههههههههههههههههه
بتريق طبعا فامنى طبعا
بس ع فكرة العيب مننا احنا
مش كل حاجه نرميها ع الحكومة
انا بشوف ناس قمة ف الاهمال ابقى راكبه الميكروباص والاقيهم بعدوا ماكلوا بيرموا ف الشارع ع الطريق
وعادى جدااااااااااااااااا ولا فارق معاهم
عشان كده مهماعملت الحكومة هتفضل الشوارع معفنه لاننا احنا نفسنا مش عاوزينها تنضف
وتقولى للواحد فيهم طب ليه يقولك هية جات عليه ماهية بلد معفنه اساسا

لما بتمشي في الشارع بيخطر علي بالك ايه من ناحية التطوير يعني
بصى اهم حاجة عشان نساعد حتى الناس ةنخليهم يتكسفوا ع دمهم لو الواحد هيرمى حاجة ف الشارع يبص يلاقى قدامه سلة مهملات
ساعتها هيتكسف من نفسه ويقول ايه اللى انا كنت هعمله ده ده انا كده شخص معفن
عشان كده لازم يكون ف سلات مش زى السلات المعفنه اللى مرمية دى وع بعد كام كيلو
لازم ع بعد كل كام متر سلة وتكون نضيفة وجديدة ودايما الزبالة بتتحاش منها اول باول
مش مليانة ولما نيجى نرمى بيقع ف الشارع وكمان مخرومة
وكمان لوحات ارشادية
ف كل مكان
تحسس الواحد ان دى بلده ولازم يحافظ عليها كويس
عشان قبل مايعمل حاجة يلاقى حاجه بتفكره وبتوقفه وتقوله لا كده غلط
ويلاقى الحاجة الصح قدامه

زائر

ندخل في الاسئله العاطفيه بقي
ايه رايك في الحب ؟ وهل مريتي بقصه حب وهل كانت فاشله ولا ناجحه؟
ايه رايك في علاقه الشباب بالبنات دلوقتي؟
هل ممكن ترتبطي حد بدون قصه حب يعني جواز صالونات؟
لو بتحبي اللي هترتبطي بيه وقالك انه مش حابك تشتغلي وانتي بتحبيه اوي هتوافقي تقعدي في البيت؟
مواصفاته هتبقي ايه الانسان اللي هترتبطي بيه؟
ايه الحاجه اللي ممكن تخليكي تحبي انسان وتعجبي بيه؟

رايك ايه في صداقه الولد مع البنت ؟ وهل ليكي صداقات مع زمايلك مثلا؟

سمسمه كتب:: علي ما تخلصي الاسئله العامه تعالي ندخل
شويه في الاسئله الدينيه والسياسيه
ماشى ياستى بس انا بقى زهقت وعاوزة اخلص بقى
ايه مفهومك عن الساسيه وايه مدي ارتباطها بالدين؟
الدين هوه الاساس للسياسه
انا لوطبقت الدين ف السياسة
يبقى فعلا قدرت انى اكون دوله ناجحه

ايه رايك في سياسه مصر داخليه وخارجيه
سياسة مصر الخارجية زى الفل
وكويسه جدااااااااااااا ف التعاملات الخارجية ومامنه نفسها كويس
وبتقدر تتعامل مع كل البلاد
بس سياسة مصر الداخلية
امممممممممممممممم زى الفل بردو عشان حبايبنا
سياسة ادى بالكرباج عشان يخافوا وماينطقوش
ايه اللي ناقصنا كشعب عشان نوصل للتقدم والرقي
ان احنا يكون لينا راى ف البلد دى
ان احنا نكون شعب فعلا مش نظام بيعمل فينا اللى عاوزه وممشى البلد بمزاجه
واحنا ياعينى مشغولين برغيف العيش وبالقمة وخلاص

ايه رايك في امن الدوله
حبايبنااااااااااااااااااااااااااا مووووووووووووووووت
دى ناس زى الفل بتدى بالعصايه بس بشويش اووووووووووووووى
وايه رايك في المظاهرات
بحس انها مالهاش لازمة ف البلد دى
مدام نفس النظام الحكومى موجود
بيسبوهم يقولوا اللى عندهم وف الاخر بياخدوهم ومش بيحصل حاجة
يعنى بيخلوهم يطلعو اللى جواهم عشان مايكونوش مكبوتين
وعشان يتقال علينا ان احنا بلد ديمقراطى بردوا
امااااااااااااااااااااال ايه
حاسه انك مقصره في واجبك ناحية دينك؟
دايما بحس انى مقصرة من ناحية دينى وبحاول اقرب من ربنا واحسن علاقتى معاه
بس ف رمضان انتى عارفه الواحد بيحاول يكون كويس فيه
بس ياريت نفضل ع كده بعد رمضان
مين احسن الشيوخ من وجة نظرك؟
ف مثلا الشيح محمد حسان وكمان الشيخ محمود المصرى ماشاء الله عليهم بجد
فيه سؤال انا سالته امبارح ومش اتجاوب عليه
ايه رايك في حادثه خالد سعيد ومين الظالم ومين المظلوم؟

مش هتجاوبي ولا هتجاوبي
والله انا الموضوع ده ماكنش بيخلينى انام ودايما صورته كانت ف بالى
انا حاسه انه هوه مظلوم
بس حكاية المخدارات دى مش عارفه شكيت ف لحظة انه يكون بتاع مخدرات بس بردوا حتى لو كان مايتعملش فيه كده
دى مش معاملة يتعامل بيها بنى ادم ولا حتى حيوان
ترشحي مين للرئاسه
كان نفسى ف ايمن نور بس خلاص ماينفععش بعد اللى عملوه فيه
مش عارفه ممكن يكون ف امل ف البرادعى ولا لا انا نفسى النظام يتغير فعلا
قانون الطوارئ ... مع؟ ام ضدد؟
ضدد
ايه رايك في وزير التعليم الجديد؟
انا معاه ف حاجات كتير بس بردو ف حاجات مش معاه فيها زى مثلا ايه اللى ماينفعش الناس تحول دى
من علمى لادبى دى فعلا حراااااااااااااااااام كده هيظلمهم فعلا وهيضيع ناس كتير باسلوبه ده ف ناس كانت ممكن تلحق تغير من نفسها ف ادبى وترفع
ازاى يخليهم يكملوا ف حاجة مش حابينها
وهل فعلا حصل ظلم كبير في نتايج الثانويه؟
بصى مش عارفه
هوه ف درجات قليلة كتير
بس بردو ف درجات عالية
وكل واحد بياخد ع اد تعبه ده اللى انا عارفاه واكيد هوه ماستقصدش الناس دى
لان فعلا ف ناس جايبه درجات حلوة
والله اعلم
تحبي مين يمسك وزاره التعليم في مصر؟
اممممممممممممم
مش عارفه والله
بس انا حابه الوزير ده حاليا
ايه رايك ف الاحزاب في مصر
والله يابنتى احنا متقسمين وخلاص اللى حاجة اسمها احزاب
ومالهاش لازمة
ماهى السياسة بتاعة الدولة بتطبق اللى عاوزاه وخلاص
ماحدش بيقدر يتكلم ف البلد دى
يعنى احنا متفرقين ع ايه
مانتحد تحت حاجة واحدة وخلاص

ايه هي القوانين الظالمه للشعب من وجهة نظرك
قوانين كتيرة ف البلد دى
منها قانون الطوارىء ده
وقوانين تانية بس مش فاكرة الصراحه

سمسمه كتب:: ندخل في الاسئله العاطفيه بقي
ادخلى بقى وخلصينى انا زهقت وعاوزة اقوم من مكانى ده
ايه رايك في الحب ؟ وهل مريتي بقصه حب وهل كانت فاشله ولا ناجحه؟
الحب المفروض انه احلى حاجة ف الوجود
بس بقيت حاسه انه مابقاش هوه ده الحب اللى المفروض موجود دلوقت
بقيت بشوف عيال وقال ايه حب
ف ناس بتحب عشان المصالح
بقت ف حاجات كتيرة تندرج قال تحت مسمى الحب
انا مريت بتجربة بس مالحقتش اصلا اعرف انى كنت بحب ولا لا يعنى اخدت قرار بسرعة ورفضت الموضوع كله

ايه رايك في علاقه الشباب بالبنات دلوقتي؟
عايشين حياتهم ع الاخر
ماينفعش اللى ببيعملووه ده بقوا اووووووووووووووفر فوق الوصف
هل ممكن ترتبطي حد بدون قصه حب يعني جواز صالونات؟
ممكن اه بصى انا نفسى بردوا اعيش قصة حب
بس ف نفس الوقت يعنى اللى هيجى ده ويتقدم ده بيكون شاريكى وداخل البيت من بابه ليه ماديلوش الفرصه
ممكن يكون شخص كويس فعلا واحبه ماينفعش ارفض المبدا عالطول
وكمان موضوع قصص الحب دلوقتى اغلبها بقى يبوء بالفشل والولد بيبيع دلوقت
ويقولك اصل ظروفى ومش ظروفى ومش هتقدرى تتستحملى وتستنى
فعشان كده اللى بيدخل من الباب ده بيبقى شخص محترمك ومحترم البيت ده وداخل جد
مش واحد ممكن يقولك بعد كده انا ماخدش واحده مشيت معاها وكمان اللى بيدخل البيت بيبقى عارف هوه ناوى ع ايه ومرتب نفسه
مش ده بيكون مثلا عايش حياته وخلاص انتى كده كده معاه ومش شايل مسئوليه
انا مش قصدى ع كل الناس كده بس المعظم كده الا لو الشخص ده فعلا نيته جد
واخد خطوات تثبت حسن نيته ساعتها يكون ع عينى وراسى
لو بتحبي اللي هترتبطي بيه وقالك انه مش حابك تشتغلي وانتي بتحبيه اوي هتوافقي تقعدي في البيت؟
بصى انا فكرت ف الموضوع ده قبل كده وواخده قرار فيه ان الشخص ده ماينفعش يحككم كده من غير مبررات لرفضه
ماهو استحالة انى اتمرمط كده ف الدراسة ويجى واحد يحطنى ويقعدنى ف البيت
بصى انا لقعد ف البيت ف حالة انى لقيت نفسى ان شغلى هيجى ع بيتى وولادى وجوزى
ساعتها هقول استوب وافكر ف القرار ده او اعدل من نفسى اما قعاد ف البيت نووووووووووووووووو
انا ليه طموح زى ماهوه ليه طموح بردو والمفروض انه يساعدنى ع كده لو بيحبنى عشان يفتخر بيا

مواصفاته هتبقي ايه الانسان اللي هترتبطي بيه؟
بصى يكون راجل بمعنى الكلمة يعنى يكون شخص مراعى ربنا متدين طبعا شخصيته قوية دى اساس مش مغرور ولا متكبر احس انى مستريحاله دى اهم حاجة عندى بردو
يكون شخص مثقف واعى كمان يكون ناجح ف شغله عنده هدف حياته
وهقولك بردو انا من النوع اللى بحب اشترى الشخص جداااااااااااااا يعنى مش هبص ع الفلوس والمظاهر الكدابه
انا احب اختار شخص اقدر اكمل معاه بقيت حياتى واحس انى اختارت صح
وان احنا الاتنين قدرنا نساعد بعض
وننجح ف حياتنا العلمية والعملية
ايه الحاجه اللي ممكن تخليكي تحبي انسان وتعجبي بيه؟
قولتهاالك فوق

رايك ايه في صداقه الولد مع البنت ؟ وهل ليكي صداقات مع زمايلك مثلا؟

هههههههههههههههههه
ف حاجات هبلة كده الواحد بقى يشوفها اليومين دول
الواد من دول لازق ف البت طول الوقت
قال ايه مالوش اصحاب
الولاد اتقطعوا عشان طول الوقت اقعد مع بنت
اوكى ممكن يوكن ف عامل مع الولد بس ف حدود الزمالة والشغل بس
ويكون ده واضح من الاول وبيبان ف التعامل
وانا ليه زمايل بحكم قسمى
او يعنى ممكن اكون احتكيت مع ناس بحكم مثلا مشروع او اى حاجة او تدريب
وبنتعامل ع اساس انهم اخواتى

زائر

تمام ياجميل
انا كنت سعيده اوي بالحلقه معاكي
وربنا يوفقك ويكرمك في حياتك كلها يارب
اجاباتك جميله وقويه
ونلتقي بكره بعون الله مع ضيف جديد

وانا كمان عاجبنى الحوار ده معاكى
ويارب تكون اجاباتى وردودى عجبتك

زائر

عجبتني جدا ياقمر والله

هههههههههههههه
ماشى الحمد لله خلصنا بدرى منك

زائر

ده بس لما لاقيتك مش حابه تقعدي كتير وكان باين عليكي قرفانه
قولت مش هكمل عليكي

هههههههههه
ماشى يااختى
انتى فين انا بكلم نفسى