مع العتذار لكل مصرى!!!!!!

مع الإعتذار لكل الأخوه المصريين

عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى

عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك

ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله

بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق

هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت

عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟ جتك القرف

هذة القصيدة للشاعر
أحمد فؤاد نجم

أنا متاسف لكل المصريين على هذة القصيدة
ولكن سأرسل لكم قصيدة أخرى لتضميدها

حرام والله انا طبعا ما اسمحش ان الكلام دة يتقال فى حق مصر مهما يحصلنا منها دى بردو بلدنا واكيد اخدنا حاجات حلوة منها خلاص نسيناها علشان شوية ناس كريهنها وعلى الرغم من كل اللى بيحصل فيها من جرائم فهي بردو امن دولة فى الكون كلة ابقوا اعرفوا اية اللى بيحصل برة وانتوا تعرفوا ان مصر لسة بخير وان شاء الله قريب هتبقى احسن والمفروض بيكم انتوا ياللى بتكتبوا فى حقها الكلام دة ومش هقول قصايد

برافو هبه النيل هو ده الكلام يخليكي لمصر ولشعب مصر

لو كل واحد قال كلام من ده احنا مش هنتقدم
وانا عايز اسال صاحب القصيدة دى
هو عمل ايه لمصر
ولا" اتأمرون الناس بالبر وتنسون انفسكم"

هبه النيل كتب:: حرام والله انا طبعا ما اسمحش ان الكلام دة يتقال فى حق مصر مهما يحصلنا منها دى بردو بلدنا واكيد اخدنا حاجات حلوة منها خلاص نسيناها علشان شوية ناس كريهنها وعلى الرغم من كل اللى بيحصل فيها من جرائم فهي بردو امن دولة فى الكون كلة ابقوا اعرفوا اية اللى بيحصل برة وانتوا تعرفوا ان مصر لسة بخير وان شاء الله قريب هتبقى احسن والمفروض بيكم انتوا ياللى بتكتبوا فى حقها الكلام دة ومش هقول قصايد

فعلا المفروض شاعر معروف
زي احمد نجم ما يقولش الكلام ده بالطريقة دي او لو في مشكلة ما نقعدش نعمل زي كل مرة و نكبر الموضوع و نخلي المشكلة كارثة و في الآخر مفيش حل ليها
طالما مش هتحل المشكلة يبقي ما تتكلمش فيها

و فعلا زي ما قالت هبة
و زي ما قال محمد
انت اديت ايه لبلدك اللي بتكرهها دي

محدش يستسلم لاي كلام بيحبطه مش بالعكس بيقويه
احنا ها نكون احسن باذن الله
طالما احنا فينا حاجات وحشة يبقي الجاي احسن
لاننا لازم نتغير و دوام الحال من المحال