الهلال مع الصليب !!!!!!!!!!!!!!!!!!!!!!!!!!!!!!!!!!!

اتحاد الهلال مع الصليب زي فرم الجزر مع الزبيب

بعد أحداث كنيسة القديسين لقيت الإعلام كله بيتكلم عن اتحاد الهلال مع الصليب , و كل الشباب حاطين صور لاتحاد الهلال مع الصليب عالفيس بوك و المنتديات و حملة شرسة بيقوم بيها الاعلام لاتحاد الهلال مع الصليب .
مجرد سؤال , بما إن الصيليب يرمز للمسيحية فهل الهلال يرمز للإسلام ؟؟
عمرنا ما سمعنا ان الرسول عليه الصلاة و السلام حارب في غزوة و كان شعاره في الغزوة الهلال , دايما كان شعار جيش المسلمين راية " لا إله إلا الله , محمد رسول الله " , طب منين يا جماعة موضوع الهلال ده ؟؟
و بعدين بدل ما عمالين نقول الهلال و الصليب , طب ما نسال الواد دقدق بتاع الهلال و النجمة ؟؟ إيه معنى الهلال ؟؟ و هل يعقل إن الهلال إلي بيرمز للإسلام يبقى شعار شركة بلاستيك ؟؟
و بعدين كل إنتخابات مجلس شعب دايما الحزب الوطني يكون شعار مرشحه الفئات ( هلال ) و مرشح العمال ( جمل ) , طب على كده بقى الحزب الوطني شعاره يرمز للإسلام و إحنا مش عارفين ؟؟
طب و لما هو الهلال يرمز للإسلام , ليه الإخوان ما بتحاولش تاخد الشعار ده طالمها هي شعارها الإسلام هو الحل .
الإجابة يا سادة و بإختصار , إن الهلال عمره ما كان شعار الإسلام و لا حصل في أي غزوة أو معركة في عهد الرسول و كان الهلال شعار جيوش المسلمين .
حكاية الهلال دي بدأت من زمان اوي , اول ما ظهر رمز الهلال ظهر في الدول العباسية سنة 75 للهجرة تقريبا , وكان معاه النجمة الخماسية المعروفة دي , و كمان حطوه رمز على عملاتهم المعدنية ده غير إنه ظهر في نقوش المساجد زي مسدج قبة الصخرة في القدس مثلا .
و بعد كده اتطور الفن و المعمار في الدول الإسلامية و في عهد الخليفة الفاطمي اترفع الهلال فوق المآذن و قباب المساجد معاكسة للنصارى إلي كانوا بيحطوا صليب على كنائسهم .

و كمان رفع العثمانيون الهلال على علمهم في القرنين الثاني عشر والثالث عشر ميلادي, وفي عهد السلطان سليم الثالث بقى العلم العثماني أحمر اللون يتوسطه هلال ونجمة, و بعد كده قلدت دول إسلامية كتيرةالعلم ده زي باكستان وماليزيا والجزائر وتونس والمغرب وموريتانيا .
ده غير إن السلطات العثمانية حطت الهلال الأحمر شارة ليها على عربيات الإسعاف بتاعتها لتفرقة عربياتها و ممرضيها عن عربيات و ممرضي الدول الأوربية غلي كانوا حطين صليب احمر على هدومهم و عربياتهم .
كل ده مش تقليل من شأن الهلال , لا خالص , بدليل إن الرسول عليه الصلاة و السلام قال " صوموا لرؤيته " الهاء هنا تعود للهلال , ده غير إن ربنا عز و جل قال في كتابه الكريم " اقتربت الساعة و انشق القمر " و لما القمر ينشق يصبح هلال .
لكن إختزال الإسلام في الهلال أعتقد من وجهة نظري المتواضعة تقليل كبير لشعار الإسلام و هو " لا إله إلا الله , محمد رسول الله " الشعار ده الي حارب الرسول عليه الصلاة و السلام من اجله و استشهد كتير من الصحابة من اجل نشر الشعار ده و رفع الراية دي , و إحنا بكل بساطة نرفع شعارنا الهلال .
الأدهى من كده إننا إحنا كمسلمين إلي بدأنا و عملنا صور لاتحاد الهلال مع الصليب , لا و عملنا مظاهرات امام الكنيسة و رفعنا شعار الهلال مع الصليب , هل ده يرضي ربنا ؟؟؟ هل ده يرضي الرسول عليه الصلاة و السلام ؟؟؟
عن عائشة رضي الله عنها قالت " لم يكن النبي صلى الله عليه وسلم يترك في بيته شيئاً فيه تصاليب إلا نقضه " رواه البخاري
و تصاليب هنا يعني أي حاجة على شكل صليب .
طب بزمتكوا بعد الكلام ده مش مكسوفين إننا عمالين رايحين جايين شايلين الصيليب مع المصحف . طب تعقل إزاي ؟؟
لا و إيه أتحدى أي مسلم شاف مسيحي شايل إنجيل و مصحف , للآسف هما بيغيروا على إنجيلهم و صليبهم اكتر مننا .
ياريت نكون فهمنا و عرفنا الصح و الغلط , أنا محبتش اقول رأيي في الأحداث إلي حصلت عشان مطولش عليكوا
و آخر جملة هاقولها و لازم كلنا نرفع الشعار ده " لا إلا إلا الله محمد رسول الله "

منقـــــــــــــــول
**************************************************************
طبعا انا الموضوع ده خنقني من زمان من ساعت ما الحوار ده حصل وانا لقيت كل الناس ع الفيس حطوا الصورة بتاع الصليب والهلال وطبعا انا معترض علي الهبل ده كله لاني انا مسلم ويكفيني فخرا اني مسلم ازاي احط صورة للصليب شعار ليا وماحدش يقول اصل ده عشان الوحده والي حصل ده حرام وغلط ويدخل في شبهات لينا كمسلمين ويمكن تصل لشبة الشرك طيب وليه انا اضع نفسي في وضع زي كده
وجزاكم الله خيرا