محمد جمعه في كرسي الاعتراف

السلام عليكم
وعليكم السلام ورحمة الله وبركاته يا كولوبالي

إزيك يا محمد
ازيك يا حبيب قلبي

أنا جييييييييييييييييييت متأخر شوية بس جييييييييييييييييييت
يا باشا تمام احسن من اللى ما جاش خالص شرفت

1- لو قالولك ليك خيار إنك تلغى مادة من عندكم هتلغى أيه ؟؟؟؟؟؟؟؟؟؟؟؟؟
ادارة الاعمال على طووووول

2- أكتر لعبة بتحبها أيه ؟؟؟؟؟؟؟؟؟؟؟؟؟؟
حاليا الشطرنج

3- مين أكتر شخصية بتحبها وأكتر شخصية مش بتحبها بلاش بتكرهها فى الكلية ؟؟؟؟؟؟؟؟
اكتر شخصيه بحبها في الكليه والله كتير بس خليها من ناحية صف هيئة التدريس علشان لو قلت من صحابي هنسا ناس
حاليا اكتر دكتور بحبه في كهربا طبعا طبعا يعني دكتور مجدي عامر
اما بقا اللى بتخنق منه كتيييير عارفه انا مش هقول اسمه بس هو معيد رياضه بيدينا السنه
وطبعا انت كنت عاوزني اقول انا بتخنق من مين بس انا هقول

4- أيه القرار اللى نفسك تاخده ومش عارف ؟؟؟؟؟؟؟؟؟؟؟؟؟
عاوز اقرر اني ما اعدش كتير على المنتدى بس مش عارف


5- حاسس كلية الهندسة عاملة إزاى؟؟؟؟؟؟؟؟؟؟
كليه زي الفل ومية فل و14 كمان


6- بتشجع الاهلى ليه فى حد يشجع نادى بيلبس أحمر؟؟؟؟؟؟؟؟؟
متهيالي انت نافقت نفسك وانت بتسال السؤال ده


7- يلا بقى عايزك زى الشاطر توصفلنا الناس اللى سألوك؟؟؟؟؟؟؟؟؟؟

الناس اللى سئلوني ماشي يا كولوبالي انا هبتدي بيك
وهقول انك واد جدع اوي ورجوله بس صايع شويه ولو تسيبك من النادي اللى انت بتشجعه ده تبقى واد فل

عصام
العقل المفكر في المنتدى

ساره
زي ما قلت قبل كده مشرفتنا الرزينه

ديمو
صاحبة الاسئله الحساسه

محمد محمود
شطرنجي المنتدى

بما ان الساعه 12 انهارده هي اخر يوم ليك
يعني لازم تختار حد

ما ترشحي انتي حد يا ساره انا محتار

ودي اخر اسأله وبسيطه كالعاده
كالعاده وبسيطه كلمتين متناقضتين خالص
هههههههههه


هل رخمت علي حد وزعل قبل كده؟
مش فاكر والله


لو زعلت حد ممكن تتأسف
له ولا ما بتحبش
تتأسف لحد؟
والله انا عنديش مانع اني اعتذر لاي حد
انما ما اتأسفش الا لبني عزيز عليه جدا
وعلى فكره في فرق كبير جدا في الاعتذار والأسف

عمرك اتحرجت من بنت؟
انا ما بتحرجش من اي بنت الا الحد المعين ده اللى ممكن اتحرج ادامه

ايه الحاجات اللى اتغيرت فيك
السنة دى ؟؟
اللى اتغير فيه السنه دي ان كان في شله كنت معاها على طول السنه اللى فاتت دلوقتي سبتها
والسنه اللى فاتت يعني كنت شقي شويه بس الحمد لله السنه دي هديت شويه


وايه ايجابيات السنة دى وايه
سلبياتها ؟؟
ايجابياتها اني اكتسبت خبره لا باس بها في فهم الناس ونظر الناس ليه لان بجد اللى شفته السنه دي ما شفتوش في اي سنه فاتت

اما السلبيات اني ما بزاكرش كويس





قرار اخدته وندمت عليه؟؟
تمت الاجابه عليه مسبقا


ايه احلى فترة فى حياتك؟؟
هو انا جاوبت عليه بس ده السؤال الوحيد اللى لو اتسألته مية مره هجاوب عليه

خمس سنين عشتهم في الاسماعيليه وما اعتقدش اني هعرف اكون صداقات احسن من اللى كانو معايه و ما اعتقدش كمان هعيش فتره زي دي تاني


مين اكثر الاعضاء شد
انتباهك؟؟ وكان ايه السبب فى كده؟؟

والله كتير شد انتباهي

بس اكترهم عصام والسبب في كده
ان ردوده فريده من نوعها وخصوصا اللهجه اللى هو بيتكلم بيها







واخيرا
كلمة توجهها لكل اعضاء المنتدى؟
بالله عليكم لاتزعلو مني
وبالله عليكم لا تمطرونا بالمواضيع ولا تمنعوها خالص ما رأيكم بوسطية عدد المواضيع

موافقه جدا
يا سلا تم ترشيح البشمهندس عصام للجلوس على كرسي الاعتراف

وعندي سؤال ليك

ياريت تحكي لنا عن مدرستك الثانوي وكمان تحكي لنا ذكرياتك معاها
السؤال ده جاي متاخر اوي يا ساره بس عادي ما اقدرش اقول لا



المدرسه اللى انا كنت فيها لو هحكي عنها محتاجه موضوع لوحده

المهم هحاول اختصر الطريق



انا لما كنت في 3 اعدادي كنت بحلم اني اكون واد جامد في الكمبيوتر وفي الوقت ده كان تعلم الكمبيوتر لوحده بس حلم اي حد تقريبا الكلام ده من 7 سنين



وكان في واحد جيراني في اطسا كان في مدرسه اسمها تكنولوجيا المعلومات والمدرسه دي بتعلم اصول الكمبيوتر



بس المهم عزمت على اني اقدم في المدرسه دي وفعلا نزلت الاسماعيليه انا ووالدي الله يرحمه وسحبت الملف ومليته ورحت تاني علشان الاختبارات وكانت الاختبارات تقريبا مشابهه لاختبارات المدارس العسكريه وكانت كمان بتقبل بمجموع حد ادنى 240

والحمد لله ربنا كرمني وكنت من ضمن ال3 اللى اخدوهم من محافظة الفيوم





مميزات المدرسه

اتعلمت فيها حاجات مش هتعلمها كلها من مكان واحد

المواد اللى درستها واللى تخص كهربا



1- هندسه كهربيه

2- هندسه الكترونيه

3- اتصالات

4- plc

5- sql

6- programming "c"

7- icdl

8- cisco "ccna"



وكمان الاكل والشرب والسكن على المدرسه



وكمان كان اللى بيطلع الاول كان بيروح رحله المجر



وكمان غير الندوات اللى كنا بناخدها في المدرسه



وكمان غير ان المواد التقيله كان بيجيلنا دكاتره من جامعة القاهره


ده كله كوووم



وتخصصي كوم تاني



انا اساسا تخصص شبكات وكان بيدينا دكتور شبكات من جامعة القاهره لحد دلوقتي من العلامات اللى اثرت فيه جدا



واساسا المدرسه دي كانت معموله علشان مشروع اسمه وادي التكنولوجيا في الاسماعيليه



والمشروع ده كانت فكرته انهم لقوا ان الرمله بتاعة اسماعيليه تصلح انها يتصنع منها مكونات الكمبيوتر زي الرامات والبورد بتاعة الكمبيوتر





لكن للأسف كعادة مصر لا يتم فيها مشروع خاص بها



والمشروع فشل

فا كان مصيرنا هو كلية الهندسه





دي كده المميزات

اما عيبها بقا انها خمس سنين وضيعت سنتين من عمري

لكن طبعا قدام كل المميزات اللى قلتها فوق دي

لا املك غير اني اقول الحمد لله







اما بقا ذكرياتي فيها فا دي كمان لوحدها عاوزه موضوع كامل

بس برضه هحاول اختصر

بس بجد فاكر فيها كل حاجه من كبيره لصغيره



بس هقولكم اليوم الطبيعي في المدرسه

الساعه 7 الصبح كان بيفوت علينا استاذ وائل مشرف الدور يصحينا علشان ننزل نفطر

نلبس الزي المدرسي وننزل نفطر

وكان الفطار فول وجبنه وحلاوه طحينيه وشاي

نخلص فطار

ندخل على الطابور

نخلص الطابور نطلع على الفصول والمعامل

واحنا طالعين المدير بيقف يشوف اللى مخالف اليونيفورم

ويا ويله اللى مخالف كان بيبقى فيها فصل



بس نطلع نحضر الحصص والمعمل ونخلص الساعه 3



وننزل نتغدى



من الساعه 3 لحد الساعه 6 راحه اللى عاوز ينام او يلعب كووره او يعمل اي حاجه



من الساعه 6 الى الساعه 9 بننزل مذاكره اجباري في الفصول وبيجيلنا مدرسين المواد علشان لو محتاجين اي حاجه



نخلص مذاكره ننزل نتعشى



ومن بعد العشا لحد الساعه 12 برضه نعمل اللى احنا عاوزينه ومن الساعه 12 للساعه7 نووم



ده اليوم الطبيعي



وبصراحه والله انا مش عارف احكي ايه ولا ايه



بس اكتر موقف وحش حصل معايه في الاسماعيليه

اني اتفصلت من المدرسه اسبوووع واخويه الكبير جالي المدرسه علشان يمضي على تعهد



وكان اللى حصل ان كان عندنا مدرسه في الفصل والمدرسه دي كانت يعني لبسها مش اوي

المهم صحابي قعدو يشتغلوها ويرمو عليها كلام



اتخنقت وسابت الفصل وراحت ندهت للمدير

المهم المدير جه ومعاه الاعيان بتوعه



المدير دخل اخد اتنين المعروف انهم مشاغبين

بعد ما اخدهم المدرسه قالت لا ده في ناس كتير مش دول بس



المهم المدير اخد الاتنين دول عملهم استجواب وبعد شويه جه المدير ندهلي

قاللي اللى احنا اخدناهم قالو ان انت كنت بتشتغل المدرسه معاهم وانت لازم تقولي مين اللى اشتغلها تاني علشان ما افصلكش طبعا عملت فيها عم الشهم وما رضتش اقول لاني لوكنت قلت كنت اكتر من نص الفصل



وفضلت احلفله مية يمين اني ما عملتش حاجه خالص ولما قابلت العيال اللى المدير قال انهم قالو اني كنت بشتغل المدرسه معاهم قالولي احنا ما قلناش كده ومن هنا لهنا واحاول يمين شمالما فيش مفر



واتفصلت ظلم وكان كل المدرسين مذهولين باللى حصل وكلهم دخلو كلمو المدير لكن حسبنا الله ونعم الوكيل فيه ما سمعش لكلام حد



وكمان يوم مش ناسيه

جالنا الدكتور احمد نظيف المدرسه وعمل معانا حوار على مشاريع التخرج اللى احنا عاملينها ومشي مبسوط اوي من المدرسه





انا عارف اني طولت بس انا كده والله لسه ما حكتش حاجه عن ذكرياتي من المدرسه

واتمنى ما تدايقوش اني طولت عليكم